kisi ki aankhon se apna chehra nikalna hai

kisī kī āñkhoñ se apnā chehra nikālnā hai

nadī ke paanī se ḳhud ko pyāsā nikālnā hai

use kaho tum ki Dor rishtoñ kī sīdhī rakkhe

mohabbatoñ kī zamīñ kā raqba nikālnā hai

jo mustahiq ho hamāre dil kā qarīb aa.e

qazā se pahle badan kā sadqa nikālnā hai

haTo ki raste nikālne haiñ pahāḌiyoñ se

ruko ki pairoñ se ek kāñTā nikālnā hai

tamām rāhoñ kī donoñ jānib bichhā do patthar

musāfiroñ ko safar kā ġhussa nikālnā hai

isī ġharaz se maiñ ḳhud ko aksar TaToltā huuñ

kahāñ pe kis kā hai kitnā hissa nikālnā hai

vo ik zamāne ke baa'd dekhegā ro paḌegā

mujhe purānā bas ek kurtā nikālnā hai

kisī kī cigarette usī kī sāzish meñ jal rahī hai

na.e makāñ se purānā huqqa nikālnā hai

kisi ki aankhon se apna chehra nikalna hai

nadi ke pani se KHud ko pyasa nikalna hai

use kaho tum ki Dor rishton ki sidhi rakkhe

mohabbaton ki zamin ka raqba nikalna hai

jo mustahiq ho hamare dil ka qarib aae

qaza se pahle badan ka sadqa nikalna hai

haTo ki raste nikalne hain pahaDiyon se

ruko ki pairon se ek kanTa nikalna hai

tamam rahon ki donon jaanib bichha do patthar

musafiron ko safar ka ghussa nikalna hai

isi gharaz se main KHud ko aksar TaTolta hun

kahan pe kis ka hai kitna hissa nikalna hai

wo ek zamane ke ba'd dekhega ro paDega

mujhe purana bas ek kurta nikalna hai

kisi ki cigarette usi ki sazish mein jal rahi hai

nae makan se purana huqqa nikalna hai