kisi ki aarzuen ab bhi hum mein raqs karti hain

kisī kī ārzūeñ ab bhī ham meñ raqs kartī haiñ

sunahrī machhliyāñ aquarium meñ raqs kartī haiñ

koī tūfāñ dabā paatā nahīñ dil kī sadāoñ ko

ye jal-pariyāñ to āb-e-yam-ba-yam meñ raqs kartī haiñ

hamārī ulfatoñ ko aap ne halkā nahīñ lenā

ba rang-e-hast bhī ḳhvāb-e-adam meñ raqs kartī haiñ

ye paiġhāmāt pahuñchātī haiñ tum tak mere maulā ke

agar chiḌiyāñ tumhāre āshram meñ raqs kartī haiñ

maiñ un par chal ke bhī kyoñ manziloñ kā ho nahīñ paayā

jo rāheñ zindagī ke pech-o-ḳham meñ raqs kartī haiñ

tirī yādeñ to jaise ban ga.ī haiñ dhaḌkaneñ pyāre

ye raqqāsā.eñ bhī dil ke haram meñ raqs kartī haiñ

niyām-e-maslahat meñ rah ke jin ko zang lagtā hai

vahī talvāreñ lahrāte alam meñ raqs kartī haiñ

umīdeñ sīna-e-ḳhanjar pe chal kar bhī nahīñ ruktīñ

ye hasrat ban ke bhī jaise iram meñ raqs kartī haiñ

tumhāre hijr kī ġhazleñ tumhāre vasl kī nazmeñ

diloñ meñ thartharātī haiñ qalam meñ raqs kartī haiñ

kisi ki aarzuen ab bhi hum mein raqs karti hain

sunahri machhliyan aquarium mein raqs karti hain

koi tufan daba pata nahin dil ki sadaon ko

ye jal-pariyan to aab-e-yam-ba-yam mein raqs karti hain

hamari ulfaton ko aap ne halka nahin lena

ba rang-e-hast bhi KHwab-e-adam mein raqs karti hain

ye paighamat pahunchati hain tum tak mere maula ke

agar chiDiyan tumhaare aashram mein raqs karti hain

main un par chal ke bhi kyon manzilon ka ho nahin paya

jo rahen zindagi ke pech-o-KHam mein raqs karti hain

teri yaaden to jaise ban gai hain dhaDkanen pyare

ye raqqasaen bhi dil ke haram mein raqs karti hain

niyam-e-maslahat mein rah ke jin ko zang lagta hai

wahi talwaren lahraate alam mein raqs karti hain

umiden sina-e-KHanjar pe chal kar bhi nahin ruktin

ye hasrat ban ke bhi jaise iram mein raqs karti hain

tumhaare hijr ki ghazlen tumhaare wasl ki nazmen

dilon mein thartharaati hain qalam mein raqs karti hain