kisi ki bewafai se kisi ko Thes lagti hai

kisī kī bevafā.ī se kisī ko Thes lagtī hai

yaqīnan zindagī se zindagī ko Thes lagtī hai

hamārā kyā hai ham ik jaam hī par sabr kar leñge

magar saaqī tirī dariyā-dilī ko Thes lagtī hai

maiñ dāġh-e-dil se duniyā ko munavvar kar to saktā huuñ

magar ai chāñd terī chāñdnī ko Thes lagtī hai

ajab dastūr-e-duniyā hai ki jab aañsū bahātā huuñ

koī masrūr hotā hai kisī ko Thes lagtī hai

jo vāqif hī nahīñ īsār ke pākīza jazbe se

usī kī dostī se dostī ko Thes lagtī hai

isī baa.is maiñ aañsū pī gayā huuñ bārhā ai dil

mire rone se phūloñ kī hañsī ko Thes lagtī hai

bhaTaktā phir rahā ho dar-ba-dar kyā ye bhī sochā hai

mirā kyā terī banda-parvarī ko Thes lagtī hai

ba-vaqt-pursish-e-bīmār-e-ġham ronā nahīñ achchhā

tumhāre āñsuoñ se dil-dahī ko Thes lagtī hai

kabhī ai 'nūr' jalve bā.is-e-tauqīr hote haiñ

kabhī javoñ hī se jalvagarī ko Thes lagtī hai

kisi ki bewafai se kisi ko Thes lagti hai

yaqinan zindagi se zindagi ko Thes lagti hai

hamara kya hai hum ek jam hi par sabr kar lenge

magar saqi teri dariya-dili ko Thes lagti hai

main dagh-e-dil se duniya ko munawwar kar to sakta hun

magar ai chand teri chandni ko Thes lagti hai

ajab dastur-e-duniya hai ki jab aansu bahata hun

koi masrur hota hai kisi ko Thes lagti hai

jo waqif hi nahin isar ke pakiza jazbe se

usi ki dosti se dosti ko Thes lagti hai

isi bais main aansu pi gaya hun barha ai dil

mere rone se phulon ki hansi ko Thes lagti hai

bhaTakta phir raha ho dar-ba-dar kya ye bhi socha hai

mera kya teri banda-parwari ko Thes lagti hai

ba-waqt-pursish-e-bimar-e-gham rona nahin achchha

tumhaare aansuon se dil-dahi ko Thes lagti hai

kabhi ai 'nur' jalwe bais-e-tauqir hote hain

kabhi jawon hi se jalwagari ko Thes lagti hai