kisi ki chashm-e-gurezan mein jal bujhe hum log

kisī kī chashm-e-gurezāñ meñ jal bujhe ham log

ajab mashaqqat-e-hijrāñ meñ jal bujhe ham log

ham apne aks ko ā.īna karne vaale the

pe ek lamha-e-hairāñ meñ jal bujhe ham log

sambhāl pā.egā phir kaun ḳhvāb kā varsa

isī ḳhayāl-e-pareshāñ meñ jal bujhe ham log

jo aañkh se nahīñ Tapke in āñsuoñ ke saath

ḳhud apne ḳhema-e-mizhgāñ meñ jal bujhe ham log

hamāre ḳhuun kī qīmat pe jo ḳharīdī ga.ī

usī bahār-e-gulistāñ meñ jal bujhe ham log

kahāñ talak ki uThāte azāb-e-tanhā.ī

akele hujla-e-vīrāñ meñ jal bujhe ham log

sazā-e-maut se bad-tar hai āgahī kī sazā

shu.ūr-e-harf ke zindāñ meñ jal bujhe ham log

hameñ kisī kā bahut intizār thā 'rūhī'

so ban ke sham.a shabistāñ meñ jal bujhe ham log

kisi ki chashm-e-gurezan mein jal bujhe hum log

ajab mashaqqat-e-hijran mein jal bujhe hum log

hum apne aks ko aaina karne wale the

pe ek lamha-e-hairan mein jal bujhe hum log

sambhaal paega phir kaun KHwab ka warsa

isi KHayal-e-pareshan mein jal bujhe hum log

jo aankh se nahin Tapke in aansuon ke sath

KHud apne KHema-e-mizhgan mein jal bujhe hum log

hamare KHun ki qimat pe jo KHaridi gai

usi bahaar-e-gulistan mein jal bujhe hum log

kahan talak ki uThate azab-e-tanhai

akele hujla-e-viran mein jal bujhe hum log

saza-e-maut se bad-tar hai aagahi ki saza

shuur-e-harf ke zindan mein jal bujhe hum log

hamein kisi ka bahut intizar tha 'ruhi'

so ban ke shama shabistan mein jal bujhe hum log