کسی کی مہربانی ہو گئی ہے

کسی کی مہربانی ہو گئی ہے

تمہیں جو بد گمانی ہو گئی ہے

قیامت کی نشانی ہو گئی ہے

جدھر دیکھو گرانی ہو گئی ہے

خوشی ہونے لگی ہے حادثوں سے

طبیعت امتحانی ہو گئی ہے

محبت جس جگہ تھی رقص فرما

حویلی وہ پرانی ہو گئی ہے

جسے دیکھو وہی سہما ہوا ہے

اگرچہ رت سہانی ہو گئی ہے

ہمارا گھر جلا کر بجلیوں کو

میسر شادمانی ہو گئی ہے

کسی کی یاد کا عالم نہ پوچھو

شریک زندگانی ہو گئی ہے

جسے محمودؔ سننا چاہتے تھے

مکمل وہ کہانی ہو گئی ہے