kisi ki mehrbani ho gai hai

kisī kī mehrbānī ho ga.ī hai

tumheñ jo bad-gumānī ho ga.ī hai

qayāmat kī nishānī ho ga.ī hai

jidhar dekho girānī ho ga.ī hai

ḳhushī hone lagī hai hādsoñ se

tabī.at imtihānī ho ga.ī hai

mohabbat jis jagah thī raqs-farmā

havelī vo purānī ho ga.ī hai

jise dekho vahī sahmā huā hai

agarche rut suhānī ho ga.ī hai

hamārā ghar jalā kar bijliyoñ ko

mayassar shādmānī ho ga.ī hai

kisī kī yaad kā aalam na pūchho

sharīk-e-zindagānī ho ga.ī hai

jise 'mahmūd' sunñā chāhte the

mukammal vo kahānī ho ga.ī hai

kisi ki mehrbani ho gai hai

tumhein jo bad-gumani ho gai hai

qayamat ki nishani ho gai hai

jidhar dekho girani ho gai hai

KHushi hone lagi hai hadson se

tabiat imtihani ho gai hai

mohabbat jis jagah thi raqs-farma

haweli wo purani ho gai hai

jise dekho wahi sahma hua hai

agarche rut suhani ho gai hai

hamara ghar jala kar bijliyon ko

mayassar shadmani ho gai hai

kisi ki yaad ka aalam na puchho

sharik-e-zindagani ho gai hai

jise 'mahmud' sunna chahte the

mukammal wo kahani ho gai hai