کسی کی سمت جب پتھر اچھالیں

کسی کی سمت جب پتھر اچھالیں

تو پہلے اپنے سر کو بھی بچا لیں

بہت آساں ہے اوروں کو پرکھنا

کبھی خود کو بھی تھوڑا آزما لیں

محبت سے مسائل حل ہوئے ہیں

دلوں سے آپ نفرت کو نکالیں

کسی کے ہونٹ پر رکھ دیں تبسم

کسی کے پاؤں کا کانٹا نکالیں

ہر اک رشتہ یہاں پر قیمتی ہے

خفا ہیں جو انہیں چل کر منا لیں

کوئی اپنا ملے گر راہ میں تو

نہ اس کو دیکھ کر دامن بچا لیں

بھلا بیٹھے ہیں اک عرصے سے جن کو

کسی دن چائے پر ان کو بلا لیں

سمجھنا ایک دوجے کو کٹھن پر

جہاں تک نبھ سکیں رشتہ نبھا لیں

نہ پچھتانا پڑے اپنے کیے پر

سمجھ کر سوچ کر ہر فیصلہ لیں

دعا لے کر کسی مجبور دل کی

چلو ہم بھی کرنؔ نیکی کما لیں