kisi ki samt jab patthar uchhaalen

kisī kī samt jab patthar uchhāleñ

to pahle apne sar ko bhī bachā leñ

bahut āsāñ hai auroñ ko parakhnā

kabhī ḳhud ko bhī thoḌā aazmā leñ

mohabbat se masā.il hal hue haiñ

diloñ se aap nafrat ko nikāleñ

kisī ke hoñT par rakh deñ tabassum

kisī ke paañv kā kāñTā nikāleñ

har ik rishta yahāñ par qīmtī hai

ḳhafā haiñ jo unheñ chal kar manā leñ

koī apnā mile gar raah meñ to

na us ko dekh kar dāman bachā leñ

bhulā baiThe haiñ ik arse se jin ko

kisī din chaa.e par un ko bulā leñ

samajhnā ek duuje ko kaThin par

jahāñ tak nibh sakeñ rishta nibhā leñ

na pachhtānā paḌe apne kiye par

samajh kar soch kar har faisla leñ

duā le kar kisī majbūr dil kī

chalo ham bhī 'kiran' nekī kamā leñ

kisi ki samt jab patthar uchhaalen

to pahle apne sar ko bhi bacha len

bahut aasan hai auron ko parakhna

kabhi KHud ko bhi thoDa aazma len

mohabbat se masail hal hue hain

dilon se aap nafrat ko nikalen

kisi ke honT par rakh den tabassum

kisi ke panw ka kanTa nikalen

har ek rishta yahan par qimti hai

KHafa hain jo unhen chal kar mana len

koi apna mile gar rah mein to

na us ko dekh kar daman bacha len

bhula baiThe hain ek arse se jin ko

kisi din chae par un ko bula len

samajhna ek duje ko kaThin par

jahan tak nibh saken rishta nibha len

na pachhtana paDe apne kiye par

samajh kar soch kar har faisla len

dua le kar kisi majbur dil ki

chalo hum bhi 'kiran' neki kama len