kisi ki yaad aankhon mein Dhali hai

kisī kī yaad āñkhoñ meñ Dhalī hai

ajab sī dil-girafta sī namī hai

ġhazal meñ soz utrā hai kisī kā

kisī kī dhaḌkanoñ kī rāgnī hai

mirī muskān kab kī kho chukī thī

purānī albamoñ meñ mil ga.ī hai

na jaane phailtī hai kyoñ judā.ī

mirī dīvār tak to aa chukī hai

damaktā hai charāġh-e-dil hamārā

falak tak raushnī phailī huī hai

koī sahrā meñ kal jalva-numā thā

koī qindīl shab bhar ko jalī hai

hamārā baam mahkāne kī ḳhātir

zarā sī der ko ḳhushbū rukī hai

kiyā hai chāñd ko jab se paḌosī

sitāre kī nazar ham par thamī hai

mile the ittifāqan jo tumheñ ham

judā.ī ittifāqan kyoñ burī hai

nazar meñ rakh liyā hai jis ko 'nīlam'

sarāpā aarzū kī chāshnī hai

kisi ki yaad aankhon mein Dhali hai

ajab si dil-girafta si nami hai

ghazal mein soz utra hai kisi ka

kisi ki dhaDkanon ki ragni hai

meri muskan kab ki kho chuki thi

purani albamon mein mil gai hai

na jaane phailti hai kyon judai

meri diwar tak to aa chuki hai

damakta hai charagh-e-dil hamara

falak tak raushni phaili hui hai

koi sahra mein kal jalwa-numa tha

koi qindil shab bhar ko jali hai

hamara baam mahkane ki KHatir

zara si der ko KHushbu ruki hai

kiya hai chand ko jab se paDosi

sitare ki nazar hum par thami hai

mile the ittifaqan jo tumhein hum

judai ittifaqan kyon buri hai

nazar mein rakh liya hai jis ko 'nilam'

sarapa aarzu ki chashni hai