kisi ki yaad ko apna shiar kar lenge

kisī kī yaad ko apnā shi.ār kar leñge

fazā-e-dahr ko ham sāzgār kar leñge

ham apne ġham ko ḳhushī meñ shumār kar leñge

ḳhizāñ ke daur meñ jashn-e-bahār kar leñge

rasā.ī hogī jo is bazm meñ kabhī apnī

nasīb vāloñ meñ apnā shumār kar leñge

kabhī milegā jo izn-e-ubūdiyat ham ko

to ek saañs meñ sajde hazār kar leñge

rahā karam jo tumhārā to bahr-e-hastī se

ham apnī kashtī-e-ummīd paar kar leñge

tirī talāsh meñ ā.eñge kaam dāġh-e-jigar

ham un se raushnī-e-rah-guzar kar leñge

ḳhushī se milne lage haiñ vo aaj kal ham se

ham apnī ziist ko ab ḳhush-gavār kar leñge

nazar hai dar pe hamārī ki dam hai āñkhoñ meñ

abhī kuchh aur tirā intizār kar leñge

ham apne ḳhalq kī duniyā sañvār kar 'ḳhushtar'

husūl-e-rahmat-e-parvardigār kar leñge

kisi ki yaad ko apna shiar kar lenge

faza-e-dahr ko hum sazgar kar lenge

hum apne gham ko KHushi mein shumar kar lenge

KHizan ke daur mein jashn-e-bahaar kar lenge

rasai hogi jo is bazm mein kabhi apni

nasib walon mein apna shumar kar lenge

kabhi milega jo izn-e-ubudiyat hum ko

to ek sans mein sajde hazar kar lenge

raha karam jo tumhaara to bahr-e-hasti se

hum apni kashti-e-ummid par kar lenge

teri talash mein aaenge kaam dagh-e-jigar

hum un se raushni-e-rah-guzar kar lenge

KHushi se milne lage hain wo aaj kal hum se

hum apni zist ko ab KHush-gawar kar lenge

nazar hai dar pe hamari ki dam hai aankhon mein

abhi kuchh aur tera intizar kar lenge

hum apne KHalq ki duniya sanwar kar 'KHushtar'

husul-e-rahmat-e-parwardigar kar lenge