kisi ki yaad mein misl-e-charagh-e-rah-guzar tanha

kisī kī yaad meñ misl-e-charāġh-e-rah-guzar tanhā

guzārī hai shab-e-ġham ham ne aksar jaag kar tanhā

mohabbat meñ hamārī zindagī kā ab ye aalam hai

gulistāñ meñ ho jaise koī sūkhā sā shajar tanhā

hamīñ par tohmat-e-dīvāngī hai kis liye āḳhir

hamīñ par to na thā ai dil mohabbat kā asar tanhā

kahīñ aisā na ho ik din ye sote ḳhushk ho jaa.eñ

mohabbat ke hazāroñ ġham haiñ merī chashm-e-tar tanhā

kisī kā saath ho to zindagī jannat-badāmāñ hai

jahannum se bhī bad-tar hai magar guzre agar tanhā

kiyā thā ahd jin rāhoñ pe ham ne saath chalne kā

vo rāheñ hañs rahī haiñ aaj mujh ko dekh kar tanhā

havādis meñ dil-e-barbād kā aalam are tauba

havā ke ruḳh pe ho jaise charāġh-e-rahguzar tanhā

kahāñ par ḳhatm ho kab ḳhatm ho ye vaqt hī jaane

safar kar to rahā huuñ zindagī kā maiñ 'zafar' tanhā

kisi ki yaad mein misl-e-charagh-e-rah-guzar tanha

guzari hai shab-e-gham hum ne aksar jag kar tanha

mohabbat mein hamari zindagi ka ab ye aalam hai

gulistan mein ho jaise koi sukha sa shajar tanha

hamin par tohmat-e-diwangi hai kis liye aaKHir

hamin par to na tha ai dil mohabbat ka asar tanha

kahin aisa na ho ek din ye sote KHushk ho jaen

mohabbat ke hazaron gham hain meri chashm-e-tar tanha

kisi ka sath ho to zindagi jannat-badaman hai

jahannum se bhi bad-tar hai magar guzre agar tanha

kiya tha ahd jin rahon pe hum ne sath chalne ka

wo rahen hans rahi hain aaj mujh ko dekh kar tanha

hawadis mein dil-e-barbaad ka aalam are tauba

hawa ke ruKH pe ho jaise charagh-e-rahguzar tanha

kahan par KHatm ho kab KHatm ho ye waqt hi jaane

safar kar to raha hun zindagi ka main 'zafar' tanha