کسی کی یاد تھی ورنہ کسی کے پاس ہی کیا تھا

کسی کی یاد تھی ورنہ کسی کے پاس ہی کیا تھا

سوا امید کے بے چارگی کے پاس ہی کیا تھا

تمنا تھی وفا تھی درد و غم تھے یاس و حرماں تھے

کہا کس نے ہماری عاشقی کے پاس ہی کیا تھا

زمانے کی تگ و دو نے اسے بھی ختم کر ڈالا

بجز انسانیت کے آدمی کے پاس ہی کیا تھا

جنوں کی رہبری نے لاج رکھ لی راہ ہستی میں

حقیقت میں ہماری زندگی کے پاس ہی کیا تھا

کہاں باقی رہی وہ بھی صبا کے گدگدانے سے

حیا کے ماسوا نازک کلی کے پاس ہی کیا تھا

اسے منزل پہ پہنچایا حوادث کے تھپیڑوں نے

نہیں تو اس شکستہ زندگی کے پاس ہی کیا تھا

غم و آلام نے فیضیؔ تجھے معراج بخشی ہے

جہان آرزو میں بیکسی کے پاس ہی کیا تھا