kisi ki zad pe koi sar nahin hai

kisī kī zad pe koī sar nahīñ hai

tumhāre shahr meñ patthar nahīñ hai

huā hai qatl apne fikr-o-fan kā

magar ḳhanjar lahū meñ tar nahīñ hai

bhare aaseb se ḳhālī makāñ haiñ

vahāñ bastī meñ koī ghar nahīñ hai

sikhātā hai sabaq duniyā ko lekin

use apnā sabaq azbar nahīñ hai

'ajab maḳhlūq haiñ rahbar hamāre

kisī kā dhaḌ kisī kā sar nahīñ hai

kuchalte haiñ use pairoñ se phir bhī

koī qānūn se uupar nahīñ hai

kamāl-e-fan hai qatl-e-'ām us kā

vo shīshagar hai āhan-gar nahīñ hai

sab apnī apnī lāsheñ Dho rahe haiñ

yahāñ par koī nauhagar nahīñ hai

nahīñ shā'ir siyāsat-dāñ hai is ko

shu'ūr-e-bāda-o-sāġhar nahīñ hai

kisi ki zad pe koi sar nahin hai

tumhaare shahr mein patthar nahin hai

hua hai qatl apne fikr-o-fan ka

magar KHanjar lahu mein tar nahin hai

bhare aaseb se KHali makan hain

wahan basti mein koi ghar nahin hai

sikhata hai sabaq duniya ko lekin

use apna sabaq azbar nahin hai

'ajab maKHluq hain rahbar hamare

kisi ka dhaD kisi ka sar nahin hai

kuchalte hain use pairon se phir bhi

koi qanun se upar nahin hai

kamal-e-fan hai qatl-e-'am us ka

wo shishagar hai aahan-gar nahin hai

sab apni apni lashen Dho rahe hain

yahan par koi nauhagar nahin hai

nahin sha'ir siyasat-dan hai is ko

shu'ur-e-baada-o-saghar nahin hai