kisi ki zulf nahin lab ki garmiyan bhi nahin

kisī kī zulf nahīñ lab kī garmiyāñ bhī nahīñ

guloñ pe aaj to āvāra titliyāñ bhī nahīñ

abhī ye haal huā is pe kashtiyāñ guzrīñ

vo gaañv jis pe kabhī chhā.īñ badliyāñ bhī nahīñ

hamārā ghar hai ki dīvāroñ kī numā.ish hai

koī kivāḌ to kyā is meñ khiḌkiyāñ bhī nahīñ

garāñ thī shab to mirī sub.h bhī hirāsāñ hai

abhī ufuq pe vo pahle sī surḳhiyāñ bhī nahīñ

asīr-e-jism hai jaañ aur ye badan apnā

kamāl kā hai qafas jis meñ tīliyāñ bhī nahīñ

ga.ī hai un pe bhī ab us kī barq-bār nazar

daraḳht jin pe hamāre to āshiyāñ bhī nahīñ

sulūk us ne mohabbat meñ vo kiyā 'bebāk'

huā jo ham se adāvat ke darmiyāñ bhī nahīñ

kisi ki zulf nahin lab ki garmiyan bhi nahin

gulon pe aaj to aawara titliyan bhi nahin

abhi ye haal hua is pe kashtiyan guzrin

wo ganw jis pe kabhi chhain badliyan bhi nahin

hamara ghar hai ki diwaron ki numaish hai

koi kiwaD to kya is mein khiDkiyan bhi nahin

garan thi shab to meri subh bhi hirasan hai

abhi ufuq pe wo pahle si surKHiyan bhi nahin

asir-e-jism hai jaan aur ye badan apna

kamal ka hai qafas jis mein tiliyan bhi nahin

gai hai un pe bhi ab us ki barq-bar nazar

daraKHt jin pe hamare to aashiyan bhi nahin

suluk us ne mohabbat mein wo kiya 'bebak'

hua jo hum se adawat ke darmiyan bhi nahin