kisi kisi ki taraf dekhta to main bhi hun

kisī kisī kī taraf dekhtā to maiñ bhī huuñ

bahut burā nahīñ itnā burā to maiñ bhī huuñ

ḳhirām-e-umar tirā kaam pā.emālī hai

magar ye dekh tire zer-e-pā to maiñ bhī huuñ

bahut udaas ho dīvār-o-dar ke jalne se

mujhe bhī Thiik se dekho jalā to maiñ bhī huuñ

talāsh-e-gum-shudgāñ meñ nikal chalūñ lekin

ye sochtā huuñ ki khoyā huā to maiñ bhī huuñ

mire liye to ye jo kuchh hai vahm hai lekin

yaqīñ karo na karo vāhima to maiñ bhī huuñ

zamīñ pe shor jo itnā hai sirf shor nahīñ

ki darmiyāñ meñ kahīñ boltā to maiñ bhī huuñ

ajab nahīñ jo mujhī par vo baat khul jaa.e

barā.e naam sahī sochtā to maiñ bhī huuñ

maiñ dūsroñ ke jahannam se bhāgtā huuñ 'faroġh'

faroġh apne liye dūsrā to maiñ bhī huuñ

kisi kisi ki taraf dekhta to main bhi hun

bahut bura nahin itna bura to main bhi hun

KHiram-e-umar tera kaam paemali hai

magar ye dekh tere zer-e-pa to main bhi hun

bahut udas ho diwar-o-dar ke jalne se

mujhe bhi Thik se dekho jala to main bhi hun

talash-e-gum-shudgan mein nikal chalun lekin

ye sochta hun ki khoya hua to main bhi hun

mere liye to ye jo kuchh hai wahm hai lekin

yaqin karo na karo wahima to main bhi hun

zamin pe shor jo itna hai sirf shor nahin

ki darmiyan mein kahin bolta to main bhi hun

ajab nahin jo mujhi par wo baat khul jae

barae nam sahi sochta to main bhi hun

main dusron ke jahannam se bhagta hun 'farogh'

farogh apne liye dusra to main bhi hun