کسی کو بھول کے بھی اپنا رازداں نہ بنا

کسی کو بھول کے بھی اپنا رازداں نہ بنا

جو تیرا دوست ہے اس کو عدوئے جاں نہ بنا

ہے مختصر سا فسانہ حیات دو روزہ

تو رنج و غم کی طویل ایک داستاں نہ بنا

یہ خاکداں ہے ہر اک چیز ہے یہاں پامال

تصرفات مہ و خور سے آسماں نہ بنا

جو دار و گیر میں امن و اماں کی خواہش ہے

تو آرزوئے نوادر کو میہماں نہ بنا

اڑا مذاق نہ تہذیب اور تمدن کا

خرد کو بیہدہ گو دل کو بے عناں نہ بنا

کچھ احترام تو لازم ہے عہد پیری کا

نظر فروش نہ ہو حرص کو جواں نہ بنا