kisi ko hasil faragh-e-hasti koi hai mamnun-e-be-nawai

kisī ko hāsil farāġh-e-hastī koī hai mamnūn-e-be-navā.ī

nizām-e-jamhūriyat yahī hai to mere mālik tirī duhā.ī

chaman meñ afsurdagī vahī hai magar fareb-e-nazar to dekho

kahīñ jo do ġhunche muskurā.e to ham ne samjhā bahār aa.ī

hazār badlā kare zamāna sau inqalāb aa.eñ fā.eda kyā

miTī na jab un kī be-niyāzī ga.ī na jab apnī jab.ha-sā.ī

ḳhulūs-e-dil hai agar salāmat miTegī ik roz ye kashākash

tumheñ mirā naġhma-e-mohabbat karegā majbūr-e-ham-navā.ī

mujhe mohabbat ne aisī manzil pe aaj pahūñchā diyā hai 'muslim'

ki dhaḌkaneñ dil kī baḌh ke ḳhud kar rahī haiñ ab merī rahnumā.ī

kisi ko hasil faragh-e-hasti koi hai mamnun-e-be-nawai

nizam-e-jamhuriyat yahi hai to mere malik teri duhai

chaman mein afsurdagi wahi hai magar fareb-e-nazar to dekho

kahin jo do ghunche muskurae to hum ne samjha bahaar aai

hazar badla kare zamana sau inqalab aaen faeda kya

miTi na jab un ki be-niyazi gai na jab apni jabha-sai

KHulus-e-dil hai agar salamat miTegi ek roz ye kashakash

tumhein mera naghma-e-mohabbat karega majbur-e-ham-nawai

mujhe mohabbat ne aisi manzil pe aaj pahuncha diya hai 'muslim'

ki dhaDkanen dil ki baDh ke KHud kar rahi hain ab meri rahnumai