kisi ko jang mein yun bhi harana paDta hai

kisī ko jang meñ yuuñ bhī harānā paḌtā hai

ki ḳhud hī tiir pe jā kar nishāna paḌtā hai

tumheñ to shahr meñ bas ānā-jānā paḌtā hai

hameñ ye ranj musalsal uThānā paḌtā hai

suḳhan-sarā.ī faqat shaġhl-e-vāh-vāh nahīñ

hameñ to Tuut ke ḳhud ko banānā paḌtā hai

lahū meñ nāchtī rahtī hai mustaqil koī shai

aur us kā saath hameñ bhī nibhānā paḌtā hai

kabhī vo mujh se ḳhayāloñ meñ ruuTh jaatā hai

phir us ko ḳhvāb meñ jā kar manānā paḌtā hai

chhupā.e rakkhoge kab tak dil-o-dimāġh kā haal

mushā.era hai yahāñ to sunānā paḌtā hai

ye 'ahd-e-bad-gumāñ qisse kahāniyoñ kā nahīñ

yahāñ to mo'jiza kar ke dikhānā paḌtā hai

kisī muhīb añdhere kī qabr hai shāyad

jahāñ charāġh musalsal jalānā paḌtā hai

paTaḳh diyā gayā lā kar mujhe yahāñ 'maz.har'

maiñ kyoñ yahāñ huuñ mujhe ḳhud batānā paḌtā hai

kisi ko jang mein yun bhi harana paDta hai

ki KHud hi tir pe ja kar nishana paDta hai

tumhein to shahr mein bas aana-jaana paDta hai

hamein ye ranj musalsal uThana paDta hai

suKHan-sarai faqat shaghl-e-wah-wah nahin

hamein to Tut ke KHud ko banana paDta hai

lahu mein nachti rahti hai mustaqil koi shai

aur us ka sath hamein bhi nibhana paDta hai

kabhi wo mujh se KHayalon mein ruTh jata hai

phir us ko KHwab mein ja kar manana paDta hai

chhupae rakkhoge kab tak dil-o-dimagh ka haal

mushaera hai yahan to sunana paDta hai

ye 'ahd-e-bad-guman qisse kahaniyon ka nahin

yahan to mo'jiza kar ke dikhana paDta hai

kisi muhib andhere ki qabr hai shayad

jahan charagh musalsal jalana paDta hai

paTaKH diya gaya la kar mujhe yahan 'mazhar'

main kyon yahan hun mujhe KHud batana paDta hai