کسی منظر میں تجھ بن دل کشی پائی نہیں جاتی

کسی منظر میں تجھ بن دل کشی پائی نہیں جاتی

طبیعت لاکھ بہلاتا ہوں بہلائی نہیں جاتی

محبت بحث غم کے درمیاں لائی نہیں جاتی

یہ کشتی دیکھ اس طوفاں میں دوڑائی نہیں جاتی

مصیبت اپنے ہاتھوں عشق کی لائی نہیں جاتی

بھڑک اٹھتی ہے خود یہ آگ بھڑکائی نہیں جاتی

مرا اک اک نفس کرتا ہے غمازی محبت کی

سکوت مصلحت سے شان گویائی نہیں جاتی

جسے میں زندگیٔ عشق کا حاصل سمجھتا تھا

زباں پر اب وہی روداد غم لائی نہیں جاتی

بیان آرزو تو کیا کہ ان کے سامنے افسوںؔ

زباں پر شوق کی روداد بھی لائی نہیں جاتی