kisi mariz ki chaaragari na kar pae

kisī marīz kī chāragarī na kar paa.e

ye ghar bhī duur mirī be-gharī na kar paa.e

maiñ kyā karūñ ki tasallut ḳhamīr meñ hī na thā

tamām umr koī naukrī na kar paa.e

shab-e-visāl guzārī udaas rahte hue

daraḳht bhī mirī duniyā harī na kar paa.e

ġhazal vahī hai jo qaarī kā dil hilā Daale

vakīl kyā hai jo mulzim barī na kar paa.e

hunar kā rabt riyāzat se hai atā se nahīñ

hasīn log kabhī dilbarī na kar paa.e

fa.uul fe.al mafā'īl kar liyā lekin

'arūziyoñ kī qasam shā.erī na kar paa.e

batāo dahriyoñ se kyā munāzra karoge

vahābiyoñ ko to tum qādrī na kar paa.e

har ek chiiz ko had meñ rakhā gayā 'hamza'

mubālġhe meñ bhī us ko parī na kare paa.e

kisi mariz ki chaaragari na kar pae

ye ghar bhi dur meri be-ghari na kar pae

main kya karun ki tasallut KHamir mein hi na tha

tamam umr koi naukri na kar pae

shab-e-visal guzari udas rahte hue

daraKHt bhi meri duniya hari na kar pae

ghazal wahi hai jo qari ka dil hila Dale

wakil kya hai jo mulzim bari na kar pae

hunar ka rabt riyazat se hai ata se nahin

hasin log kabhi dilbari na kar pae

faul feal mafa'il kar liya lekin

'aruziyon ki qasam shaeri na kar pae

batao dahriyon se kya munazra karoge

wahabiyon ko to tum qadri na kar pae

har ek chiz ko had mein rakha gaya 'hamza'

mubaalghe mein bhi us ko pari na kare pae