kisi mein tab-e-alam nahin hai kisi mein soz-e-wafa nahin hai

kisī meñ tāb-e-alam nahīñ hai kisī meñ soz-e-vafā nahīñ hai

sunā.eñ kis ko hikāyat-e-ġham ki koī dard-āshnā nahīñ hai

ham inqalāb-e-falak ke hāthoñ bahut satā.e hue haiñ yā-rab

ye nāla-e-be-kasī hamārā shikāyat-e-nāravā nahīñ hai

hujūm-e-vāraftagī ke hāthoñ jo jaañ chalī to khulā ye uqda

ki tār-o-paud--eḳhayāl-e-dilbar se rishta-e-jāñ judā nahīñ hai

kal us but-e-bā-vafā se mil kar jo aur betāb ho gayā dil

huā ye zāhir ki ranj-o-ġham kī jahāñ meñ koī davā nahīñ hai

yahī hai ab aarzū 'tabassum' ki dam nikal jaa.e aah karte

ki tāb-e-iz.hār-e-ulfat-e-yār sheva-e-āshnā nahīñ hai

kisi mein tab-e-alam nahin hai kisi mein soz-e-wafa nahin hai

sunaen kis ko hikayat-e-gham ki koi dard-ashna nahin hai

hum inqalab-e-falak ke hathon bahut satae hue hain ya-rab

ye nala-e-be-kasi hamara shikayat-e-narawa nahin hai

hujum-e-waraftagi ke hathon jo jaan chali to khula ye uqda

ki tar-o-paud--eKHayal-e-dilbar se rishta-e-jaan juda nahin hai

kal us but-e-ba-wafa se mil kar jo aur betab ho gaya dil

hua ye zahir ki ranj-o-gham ki jahan mein koi dawa nahin hai

yahi hai ab aarzu 'tabassum' ki dam nikal jae aah karte

ki tab-e-izhaar-e-ulfat-e-yar shewa-e-ashna nahin hai