kisi na-fahm se izhaar-e-tamanna karna

kisī nā-fahm se iz.hār-e-tamannā karnā

apnī ḳhāmosh mohabbat ko hai rusvā karnā

hai abhī der ki ho aql sharīk-e-jazbāt

shauq ko hai abhī mātam tan-e-tanhā karnā

khul sakī ham se na ab tak ġham-e-jānāñ kī girah

abhī baaqī hai ilāj-e-ġham-e-duniyā karnā

ab ye gesū haiñ jo āshufta to kis kā hai qusūr

ham ne to chhoḌ diyā arz-e-tamannā karnā

zulf kī chhāñv meñ ārām kiyā chal niklā

ik musāfir pe na thā tum ko bharosa karnā

kuchh kashish merī nazar ko bhī atā kar ai dost

tere bikhre hue jalvoñ ko hai yakjā karnā

tum ko 'ehsān' mubārak ho ye andāz-e-‘jamīl’

rang apnā bhī magar chāhiye paidā karnā

kisi na-fahm se izhaar-e-tamanna karna

apni KHamosh mohabbat ko hai ruswa karna

hai abhi der ki ho aql sharik-e-jazbaat

shauq ko hai abhi matam tan-e-tanha karna

khul saki hum se na ab tak gham-e-jaanan ki girah

abhi baqi hai ilaj-e-gham-e-duniya karna

ab ye gesu hain jo aashufta to kis ka hai qusur

hum ne to chhoD diya arz-e-tamanna karna

zulf ki chhanw mein aaram kiya chal nikla

ek musafir pe na tha tum ko bharosa karna

kuchh kashish meri nazar ko bhi ata kar ai dost

tere bikhre hue jalwon ko hai yakja karna

tum ko 'ehsan' mubarak ho ye andaz-e-‘jamil’

rang apna bhi magar chahiye paida karna