kisi nai tarha ki rawani mein ja raha tha

kisī na.ī tarha kī ravānī meñ jā rahā thā

charāġh thā koī aur paanī meñ jā rahā thā

rukā huā thā vo qāfila to magar abhī tak

ġhubār apnī hī be-karānī meñ jā rahā thā

mujhe ḳhabar thī vo kyā karegā sulūk mujh se

so maiñ ba-zāhir to ḳhush-gumānī meñ jā rahā thā

maiñ tañgi-e-dil se ḳhush nahīñ thā isī sabab se

makāñ se bāhar kī lā-makānī meñ jā rahā thā

tum apnī mastī meñ aan Takrā.e mujh se yak-dam

idhar se maiñ bhī to be-dhyānī meñ jā rahā thā

tirī rukāvaT se bhī mire paañv kaise rukte

ki maiñ kisī aur sar-girānī meñ jā rahā thā

mire liye ajnabī thā sailāb-e-ḳhvāb meñ vo

jo lafz chup-chāp mauj-e-ma.anī meñ jā rahā thā

suḳhan se bīmār kyuuñ na hotā maiñ āḳhir apne

ki lutf saarā to ḳhush-bayānī meñ jā rahā thā

'zafar' mire ḳhvāb vaqt-e-āḳhir bhī tāza-dam the

ye lag rahā thā ki maiñ javānī meñ jā rahā thā

kisi nai tarha ki rawani mein ja raha tha

charagh tha koi aur pani mein ja raha tha

ruka hua tha wo qafila to magar abhi tak

ghubar apni hi be-karani mein ja raha tha

mujhe KHabar thi wo kya karega suluk mujh se

so main ba-zahir to KHush-gumani mein ja raha tha

main tangi-e-dil se KHush nahin tha isi sabab se

makan se bahar ki la-makani mein ja raha tha

tum apni masti mein aan Takrae mujh se yak-dam

idhar se main bhi to be-dhyani mein ja raha tha

teri rukawaT se bhi mere panw kaise rukte

ki main kisi aur sar-girani mein ja raha tha

mere liye ajnabi tha sailab-e-KHwab mein wo

jo lafz chup-chap mauj-e-mani mein ja raha tha

suKHan se bimar kyun na hota main aaKHir apne

ki lutf sara to KHush-bayani mein ja raha tha

'zafar' mere KHwab waqt-e-aKHir bhi taza-dam the

ye lag raha tha ki main jawani mein ja raha tha