kisi nashshe se beshtar to na tha

kisī nashshe se beshtar to na thā

rishta-e-ġham bhī mo'atabar to na thā

mere anjām unheñ fareb na de

kam-basar thā maiñ kam-nazar to na thā

kam to pahle bhī the na ahl-e-junūñ

lekin ab tak junūñ hunar to na thā

apnī har ḳhud-supurdagī kī qasam

maiñ jahāñ thā vo merā ghar to na thā

ham the rāheñ tarāshne ke liye

shāmil is farz meñ safar to na thā

saa.e logoñ ke sar pe kis ne kiye

duur tak ek bhī shajar to na thā

ḳhaak par gir ke miT gayā āḳhir

ashk phir ashk thā guhar to na thā

vādī-e-marg kyoñ adam Thahrī

zindagī se vahāñ mafar to na thā

vaqt kī baat hai miyāñ 'hairat'

dil lagāne meñ aisā Dar to na thā

kisi nashshe se beshtar to na tha

rishta-e-gham bhi mo'atabar to na tha

mere anjam unhen fareb na de

kam-basar tha main kam-nazar to na tha

kam to pahle bhi the na ahl-e-junun

lekin ab tak junun hunar to na tha

apni har KHud-supurdagi ki qasam

main jahan tha wo mera ghar to na tha

hum the rahen tarashne ke liye

shamil is farz mein safar to na tha

sae logon ke sar pe kis ne kiye

dur tak ek bhi shajar to na tha

KHak par gir ke miT gaya aaKHir

ashk phir ashk tha guhar to na tha

wadi-e-marg kyon adam Thahri

zindagi se wahan mafar to na tha

waqt ki baat hai miyan 'hairat'

dil lagane mein aisa Dar to na tha