kisi ne chehre pe bikhra liya tha zulfon ko

kisī ne chehre pe bikhrā liyā thā zulfoñ ko

zarā sī baat thī bas le uḌe haiñ dīvāne

ye phuul khilte haiñ gulzār meñ ki parde se

baḌhā ke haath koī de rahā hai paimāne

huī hai bā.is-e-tuġhyān-e-ishq garmi-e-husn

jale na sham.a to kyuuñ ghir ke aa.eñ parvāne

jahān jin se thā ik bazm nā-o-nosh tamām

kahāñ vo bāda-gusār ab kahāñ vo maiḳhāne

jo aql vaale haiñ chalte haiñ apnī apnī raah

sab ik ravish pe chale jā rahe haiñ dīvāne

nahīñ hai farq koī nuur aur zulmat meñ

havās gum haiñ vo palTā liyā hai duniyā ne

chamak uTheñ to mah-o-mahr ko bhī kar deñ maañd

vo zarre god meñ apnī liye haiñ vīrāne

kisī ke tiir lage siine meñ ḳhudā na kare

hamāre dil meñ hai kyā dard koī kyā jaane

hamāre vāste saaqī piyāla-o-ḳhum ek

chhalak chaleñ jo vo hote haiñ aur paimāne

ḳhudā samajhne se āḳhir bachā liyā mujh ko

hazār shukr mire aib tum ne pahchāne

hai dil meñ aag to āñkhoñ meñ lāla-zār 'jigar'

nigāh-e-nāz ke andāz koī kyā jaane

kisi ne chehre pe bikhra liya tha zulfon ko

zara si baat thi bas le uDe hain diwane

ye phul khilte hain gulzar mein ki parde se

baDha ke hath koi de raha hai paimane

hui hai bais-e-tughyan-e-ishq garmi-e-husn

jale na shama to kyun ghir ke aaen parwane

jahan jin se tha ek bazm na-o-nosh tamam

kahan wo baada-gusar ab kahan wo maiKHane

jo aql wale hain chalte hain apni apni rah

sab ek rawish pe chale ja rahe hain diwane

nahin hai farq koi nur aur zulmat mein

hawas gum hain wo palTa liya hai duniya ne

chamak uThen to mah-o-mahr ko bhi kar den mand

wo zarre god mein apni liye hain virane

kisi ke tir lage sine mein KHuda na kare

hamare dil mein hai kya dard koi kya jaane

hamare waste saqi piyala-o-KHum ek

chhalak chalen jo wo hote hain aur paimane

KHuda samajhne se aaKHir bacha liya mujh ko

hazar shukr mere aib tum ne pahchane

hai dil mein aag to aankhon mein lala-zar 'jigar'

nigah-e-naz ke andaz koi kya jaane