kisi parinde ki wapsi ka safar meri KHak mein milega

kisī parinde kī vāpsī kā safar mirī ḳhaak meñ milegā

maiñ chup rahūñgā shajar kī sūrat shajar mirī ḳhaak meñ milegā

udaas āñkheñ sulagte chehroñ kī mujh ko āvāz de rahī haiñ

kabhī jo ābād rah chukā hai vo ghar mirī ḳhaak meñ milegā

lahū kī bārish meñ zard phūloñ kī pattiyoñ se likhā gayā huuñ

maiñ lafz kā zā.iqa zabāñ par asar mirī ḳhaak meñ milegā

dayār-e-shab ke bhaTakte raahī shikār-e-tashkīk-o-kam-nigāhī

alaav raushan kahīñ jo kar de sharar mirī ḳhaak meñ milegā

azal se sūraj abad meñ talāsh jis ko kartā huā gayā hai

sadaf zamīñ hai to zindagī kā guhar mirī ḳhaak meñ milegā

vo bastiyāñ jo tabāhiyoñ meñ numū kī tasvīr ban ga.ī haiñ

vajūd jin kā kahīñ nahīñ hai magar mirī ḳhaak meñ milegā

maiñ chashm-e-pur-nam kī mish.aloñ se charāġh-e-fardā jalā rahā huuñ

ki naqsh-e-irfān-o-āgahī bhī 'zafar' mirī ḳhaak meñ milegā

kisi parinde ki wapsi ka safar meri KHak mein milega

main chup rahunga shajar ki surat shajar meri KHak mein milega

udas aankhen sulagte chehron ki mujh ko aawaz de rahi hain

kabhi jo aabaad rah chuka hai wo ghar meri KHak mein milega

lahu ki barish mein zard phulon ki pattiyon se likha gaya hun

main lafz ka zaiqa zaban par asar meri KHak mein milega

dayar-e-shab ke bhaTakte rahi shikar-e-tashkik-o-kam-nigahi

alaw raushan kahin jo kar de sharar meri KHak mein milega

azal se suraj abad mein talash jis ko karta hua gaya hai

sadaf zamin hai to zindagi ka guhar meri KHak mein milega

wo bastiyan jo tabahiyon mein numu ki taswir ban gai hain

wajud jin ka kahin nahin hai magar meri KHak mein milega

main chashm-e-pur-nam ki mishalon se charagh-e-farda jala raha hun

ki naqsh-e-irfan-o-agahi bhi 'zafar' meri KHak mein milega