kisi se ahd-o-paiman kar na rahiyo

kisī se ahd-o-paimāñ kar na rahiyo

to us bastī meñ rahiyo par na rahiyo

safar karnā hai āḳhir do palak biich

safar lambā hai be bistar na rahiyo

har ik hālat ke berī haiñ ye lamhe

kisī ġham ke bharose par na rahiyo

suhūlat se guzar jaao mirī jaañ

kahīñ jiine kī ḳhātir mar na rahiyo

hamārā umr-bhar kā saath Therā

so mere saath tū din-bhar na rahiyo

bahut dushvār ho jā.egā jiinā

yahāñ to zaat ke andar na rahiyo

savere hī se ghar ājā.iyo aaj

hai roz-e-vāqi.a bāhar na rahiyo

kahīñ chhup jaao tah ḳhānoñ meñ jā kar

shab-e-fitna hai apne ghar na rahiyo

nazar par baar ho jaate haiñ manzar

jahāñ rahiyo vahāñ aksar na rahiyo

kisi se ahd-o-paiman kar na rahiyo

to us basti mein rahiyo par na rahiyo

safar karna hai aaKHir do palak bich

safar lamba hai be bistar na rahiyo

har ek haalat ke beri hain ye lamhe

kisi gham ke bharose par na rahiyo

suhulat se guzar jao meri jaan

kahin jine ki KHatir mar na rahiyo

hamara umr-bhar ka sath Thera

so mere sath tu din-bhar na rahiyo

bahut dushwar ho jaega jina

yahan to zat ke andar na rahiyo

sawere hi se ghar aajaiyo aaj

hai roz-e-waqia bahar na rahiyo

kahin chhup jao tah KHanon mein ja kar

shab-e-fitna hai apne ghar na rahiyo

nazar par bar ho jate hain manzar

jahan rahiyo wahan aksar na rahiyo