kisi se ai dil-e-nadan jo pyar karna hai

kisī se ai dil-e-nādāñ jo pyaar karnā hai

to zabt kī tumheñ har had ko paar karnā hai

kisī amiir kī ulfat se kyā milegā mujhe

ġharīb huuñ to ġharīboñ se pyaar karnā hai

har ek dil meñ jalā do mohabbatoñ ke charāġh

vatan ko apne agar pur-bahār karnā hai

amīr-e-shahr banātā hai roz mansūbe

kise zalīl kise pur-vaqār karnā hai

tamām shahr ke dil meñ basā de pyaar mirā

mire ḳhudā jo mujhe tājdār karnā hai

lagā rahe ho jo pābandiyāñ mohabbat par

ye jurm hai to hameñ baar baar karnā hai

zabāñ se us kī adā ho jo baat ai 'rizvāñ'

durust ho ki ġhalat e'tibār karnā hai

kisi se ai dil-e-nadan jo pyar karna hai

to zabt ki tumhein har had ko par karna hai

kisi amir ki ulfat se kya milega mujhe

gharib hun to gharibon se pyar karna hai

har ek dil mein jala do mohabbaton ke charagh

watan ko apne agar pur-bahaar karna hai

amir-e-shahr banata hai roz mansube

kise zalil kise pur-waqar karna hai

tamam shahr ke dil mein basa de pyar mera

mere KHuda jo mujhe tajdar karna hai

laga rahe ho jo pabandiyan mohabbat par

ye jurm hai to hamein bar bar karna hai

zaban se us ki ada ho jo baat ai 'rizwan'

durust ho ki ghalat e'tibar karna hai