kisi se jang kisi se jihad chahte hain

kisī se jang kisī se jihād chāhte haiñ

ḳhudā ke naam pe kyā kyā fasād chāhte haiñ

ye gidh nahīñ ye mire ḳhāndān vaale haiñ

ye merā gosht nahīñ jā.edād chāhte haiñ

kareñge tujh se kabhī ḳhvāb ke tabādale bhī

abhī to sirf tirā e'timād chāhte haiñ

ḳhudā ko ḳhushiyoñ ke aalam meñ pūchhte bhī nahīñ

yahāñ charāġh ko sab din ke baad chāhte haiñ

maiñ be-sabab tujhe milne kā thoḌī kahtā huuñ

numū ke vāste paude bhī khaad chāhte haiñ

akelā maiñ nahīñ misroñ kā mālik-o-ma.abūd

luġhat-navīs bhī lafzoñ se daad chāhte haiñ

ḳhudā ko zahmat-e-kun denī chāhiye 'hamza'

tamām kaun-o-makāñ ijtihād chāhte haiñ

kisi se jang kisi se jihad chahte hain

KHuda ke nam pe kya kya fasad chahte hain

ye gidh nahin ye mere KHandan wale hain

ye mera gosht nahin jaedad chahte hain

karenge tujh se kabhi KHwab ke tabaadale bhi

abhi to sirf tera e'timad chahte hain

KHuda ko KHushiyon ke aalam mein puchhte bhi nahin

yahan charagh ko sab din ke baad chahte hain

main be-sabab tujhe milne ka thoDi kahta hun

numu ke waste paude bhi khad chahte hain

akela main nahin misron ka malik-o-mabud

lughat-nawis bhi lafzon se dad chahte hain

KHuda ko zahmat-e-kun deni chahiye 'hamza'

tamam kaun-o-makan ijtihad chahte hain