kisi se pyar kar le ya kisi se pyar ho jae

kisī se pyaar kar le yā kisī se pyaar ho jaa.e

yahī āzār hai to phir mujhe āzār ho jaa.e

rasīle hoñT gadrāyā badan aur chashm-e-ḳhvābīda

koī dekhe use to be-piye sarshār ho jaa.e

yahī āzādī-e-iz.hār kā matlab hai kyā logo

zabāñ tirshūl ho jaa.e qalam talvār ho jaa.e

yahī rasm-e-mohabbat hai isī meñ lutf aatā hai

kabhī inkār ho jaa.e kabhī iqrār ho jaa.e

munāfiq kā yahī tarz-e-'amal pahchān hai us kī

kabhī is paar ho jaa.e kabhī us paar ho jaa.e

tabassum us ke hoñToñ kā bahāroñ kī amānat hai

vo hañs de to bayābāñ bhī gul-o-gulzār ho jaa.e

maiñ apnā istiġhāsa le ke jā.ūñ kis 'adālat meñ

agar dil hī asīr-e-gesū-e-ḳham-dār ho jaa.e

matā-e-dil ke luTne kā gila kis se kareñ jā kar

koī qazzāq hī jab qāfila-sālār ho jaa.e

'suhaib' apnī du'āoñ meñ yahī ik vird kartā hai

jo insāñ haiñ unheñ insāniyat se pyaar ho jaa.e

kisi se pyar kar le ya kisi se pyar ho jae

yahi aazar hai to phir mujhe aazar ho jae

rasile honT gadraya badan aur chashm-e-KHwabida

koi dekhe use to be-piye sarshaar ho jae

yahi aazadi-e-izhaar ka matlab hai kya logo

zaban tirshul ho jae qalam talwar ho jae

yahi rasm-e-mohabbat hai isi mein lutf aata hai

kabhi inkar ho jae kabhi iqrar ho jae

munafiq ka yahi tarz-e-'amal pahchan hai us ki

kabhi is par ho jae kabhi us par ho jae

tabassum us ke honTon ka bahaaron ki amanat hai

wo hans de to bayaban bhi gul-o-gulzar ho jae

main apna istighasa le ke jaun kis 'adalat mein

agar dil hi asir-e-gesu-e-KHam-dar ho jae

mata-e-dil ke luTne ka gila kis se karen ja kar

koi qazzaq hi jab qafila-salar ho jae

'suhaib' apni du'aon mein yahi ek wird karta hai

jo insan hain unhen insaniyat se pyar ho jae