kisi se tum na kahin barhami ki baat karo

kisī se tum na kahīñ barhamī kī baat karo

jahāñ meñ jis se karo dostī kī baat karo

jalāo sham.eñ ḳhulūs-o-vafā kī duniyā meñ

har ek moḌ pe tum raushnī kī baat karo

bahār laa.e jo sab ke liye gulistāñ meñ

ravish ravish pe usī aadmī kī baat karo

taqāzā hosh-o-ḳhirad kā hai tum se dīvāno

junūñ ke daur meñ bhī āgahī kī baat karo

jo ek buuñd bhī rindoñ ko de sake na sharāb

na us ke mansab-e-sāqī-girī kī baat karo

fanā-shikār na ho jo kabhī zamāne meñ

qadam qadam pe tum us zindagī kī baat karo

tumheñ payām-e-mohabbat jo aam karnā hai

kisī se 'shād' na tum dushmanī kī baat karo

kisi se tum na kahin barhami ki baat karo

jahan mein jis se karo dosti ki baat karo

jalao shamen KHulus-o-wafa ki duniya mein

har ek moD pe tum raushni ki baat karo

bahaar lae jo sab ke liye gulistan mein

rawish rawish pe usi aadmi ki baat karo

taqaza hosh-o-KHirad ka hai tum se diwano

junun ke daur mein bhi aagahi ki baat karo

jo ek bund bhi rindon ko de sake na sharab

na us ke mansab-e-saqi-giri ki baat karo

fana-shikar na ho jo kabhi zamane mein

qadam qadam pe tum us zindagi ki baat karo

tumhein payam-e-mohabbat jo aam karna hai

kisi se 'shad' na tum dushmani ki baat karo