kisi se unki jafaon ka tazkira na karo

kisī se un kī jafāoñ kā tazkira na karo

hazār zulm vo Dhā.eñ magar gila na karo

har ek lamha guzartā hai ik sadī jaisā

ta.alluqāt baḌhā kar judā rahā na karo

mirī hayāt ko nisbat bas ik tumhīñ se hai

tum apne saath hī rakkho mujhe judā na karo

tabāhī tum ne to ḳhud mol lī hai ahl-e-chaman

kisī se apnī tabāhī kā ab gila na karo

vo sab ke dil kī talab se haiñ bā-ḳhabar 'nayyar'

tum un kī bazm meñ iz.hār-e-mudda.ā na karo

kisi se un ki jafaon ka tazkira na karo

hazar zulm wo Dhaen magar gila na karo

har ek lamha guzarta hai ek sadi jaisa

talluqat baDha kar juda raha na karo

meri hayat ko nisbat bas ek tumhin se hai

tum apne sath hi rakkho mujhe juda na karo

tabahi tum ne to KHud mol li hai ahl-e-chaman

kisi se apni tabahi ka ab gila na karo

wo sab ke dil ki talab se hain ba-KHabar 'nayyar'

tum un ki bazm mein izhaar-e-muddaa na karo