kisi se wasl mein sunte hi jaan sukh gai

kisī se vasl meñ sunte hī jaan suukh ga.ī

chalo haTo bhī hamārī zabān suukh ga.ī

ik āh-e-garm ne jhulsā.e ḳhosha-e-anjum

tamām khetī tirī āsmān suukh ga.ī

qayāmat aur vo hañgāma phir qayāmat kā

lahad se uThte hī dhaḌkoñ se jaan suukh ga.ī

rahā na ba.ad mire haa.e koī ābla-pā

pukārte haiñ ye kāñTe zabān suukh ga.ī

shab-e-firāq kā aadhā nahīñ rahā tan-o-tosh

ye mere ghar jo huī mehmān suukh ga.ī

milā bhī ham ko to be-vaqt is tarah khānā

ki chāval aiñTh ga.e aur naan suukh ga.ī

bahut hī phūlī huī thī ye apnī rañgat par

jo dekhā rañg mirā za.afrān suukh ga.ī

havā-e-garm ḳhizāñ meñ vo rañg-o-rūp kahāñ

thī andalīb yūñhī dhān-pān suukh ga.ī

'riyāz' yaad hai un kā visāl meñ kahnā

ḳhudā ke vāste chhoḌo zabān suukh ga.ī

kisi se wasl mein sunte hi jaan sukh gai

chalo haTo bhi hamari zaban sukh gai

ek aah-e-garm ne jhulsae KHosha-e-anjum

tamam kheti teri aasman sukh gai

qayamat aur wo hangama phir qayamat ka

lahad se uThte hi dhaDkon se jaan sukh gai

raha na baad mere hae koi aabla-pa

pukarte hain ye kanTe zaban sukh gai

shab-e-firaq ka aadha nahin raha tan-o-tosh

ye mere ghar jo hui mehman sukh gai

mila bhi hum ko to be-waqt is tarah khana

ki chawal ainTh gae aur nan sukh gai

bahut hi phuli hui thi ye apni rangat par

jo dekha rang mera zafran sukh gai

hawa-e-garm KHizan mein wo rang-o-rup kahan

thi andalib yunhi dhan-pan sukh gai

'riyaz' yaad hai un ka visal mein kahna

KHuda ke waste chhoDo zaban sukh gai