kisi shab usko be-parda to aana chahiye tha

kisī shab us ko be-parda to aanā chāhiye thā

hamāre zarf ko bhī āzmānā chāhiye thā

ḳhayāloñ meñ na aane kī use tākīd kī hai

magar phir bhī shikāyat hai ki aanā chāhiye thā

ham āḳhir-kār shīshe meñ utar jaate kisī din

tumheñ ik aur nusḳha āzmānā chāhiye the

sabhī se dil-lagī karnā jo hai fitrat tumhārī

to ye sab kuchh tumheñ pahle batānā chāhiye thā

mujhe ummīd thī vo maan jā.egā bahut jald

magar us ko to shāyad ik zamāna chāhiye thā

tamannā thī mirī ḳhushiyoñ se bhar duuñ us kā dāman

use lekin ġhamoñ kā kār-ḳhāna chāhiye thā

bahut mushkil se bantā hai jahāñ meñ koī apnā

tumheñ har haal meñ rishta nibhānā chāhiye thā

gumāñ thā 'shād' us ko mujh se ulfat ho ga.ī hai

use rone ko lekin merā shāna chāhiye thā

kisi shab us ko be-parda to aana chahiye tha

hamare zarf ko bhi aazmana chahiye tha

KHayalon mein na aane ki use takid ki hai

magar phir bhi shikayat hai ki aana chahiye tha

hum aaKHir-kar shishe mein utar jate kisi din

tumhein ek aur nusKHa aazmana chahiye the

sabhi se dil-lagi karna jo hai fitrat tumhaari

to ye sab kuchh tumhein pahle batana chahiye tha

mujhe ummid thi wo man jaega bahut jald

magar us ko to shayad ek zamana chahiye tha

tamanna thi meri KHushiyon se bhar dun us ka daman

use lekin ghamon ka kar-KHana chahiye tha

bahut mushkil se banta hai jahan mein koi apna

tumhein har haal mein rishta nibhana chahiye tha

guman tha 'shad' us ko mujh se ulfat ho gai hai

use rone ko lekin mera shana chahiye tha