kisi surat kisi pahlu sukun-e-dil nahin milta

kisī sūrat kisī pahlū sukūn-e-dil nahīñ miltā

kahāñ DhūñDeñ vo jān-e-raunaq-e-mahfil nahīñ miltā

aqīdat hai mohabbat hai baḌī qurbat bhī hai lekin

ḳhudā jaane ki kyoñ mujh se tumhārā dil nahīñ miltā

maiñ vāqif huuñ dil-e-bismil ki terā mudda.ā kyā hai

pareshāñ haiñ nigāheñ kūcha-e-qātil nahīñ miltā

mizāj-e-yār kī sūrat zamāna ruḳh badaltā hai

kabhī maazī se merā hāl-o-mustaqbil nahīñ miltā

ye duniyā dil-rubā bhī hai ye duniyā bevafā bhī hai

yahāñ har chiiz miltī hai sukūn-e-dil nahīñ miltā

yahāñ āsāñ nahīñ jiinā yahāñ marnā bhī mushkil hai

mohabbat meñ kisī ko mudda.ā-e-dil nahīñ miltā

zamāna thā inhī maujoñ pe merī hukmrānī thī

huā ye haal kashtī ko bhī ab sāhil nahīñ miltā

sitāroñ do ghaḌī ke vāste āñkheñ hameñ de do

zamīñ kā ye ajūba hai mah-e-kāmil nahīñ miltā

jise vo mil gayā ho jis kā vo tālib thā duniyā meñ

'nazīr' aisā koī DhūñDe se bhī saa.il nahīñ miltā

kisi surat kisi pahlu sukun-e-dil nahin milta

kahan DhunDen wo jaan-e-raunaq-e-mahfil nahin milta

aqidat hai mohabbat hai baDi qurbat bhi hai lekin

KHuda jaane ki kyon mujh se tumhaara dil nahin milta

main waqif hun dil-e-bismil ki tera muddaa kya hai

pareshan hain nigahen kucha-e-qatil nahin milta

mizaj-e-yar ki surat zamana ruKH badalta hai

kabhi mazi se mera haal-o-mustaqbil nahin milta

ye duniya dil-ruba bhi hai ye duniya bewafa bhi hai

yahan har chiz milti hai sukun-e-dil nahin milta

yahan aasan nahin jina yahan marna bhi mushkil hai

mohabbat mein kisi ko muddaa-e-dil nahin milta

zamana tha inhi maujon pe meri hukmrani thi

hua ye haal kashti ko bhi ab sahil nahin milta

sitaron do ghaDi ke waste aankhen hamein de do

zamin ka ye ajuba hai mah-e-kaamil nahin milta

jise wo mil gaya ho jis ka wo talib tha duniya mein

'nazir' aisa koi DhunDe se bhi sail nahin milta