کسی طرح سے نہ بہلا فراق یار میں دل

کسی طرح سے نہ بہلا فراق یار میں دل

خزاں کی طرح فسردہ رہا بہار میں دل

نہیں ہے چین مقدر میں بے قراروں کے

ہمارے ساتھ تڑپتا رہا مزار میں دل

تفکرات جہاں سے ہے یک قلم آزاد

پھنسا ہوا ترے گیسوئے تابدار میں دل

اگر تو آ نہیں سکتا تو کاش اجل آئے

ہے بے قرار بہت تیرے انتظار میں دل

کمال حسن تصور یہ ہے کہ رہتا ہے

شگفتہ گل کی طرح یاد روئے یار میں دل

کہاں ہے عشق جو آ کر اسے چھڑا جائے

گھرا ہوا ہے بلا ہائے روزگار میں دل

بس اپنی اپنی جگہ لا جواب ہیں دونوں

غرور میں نگہ یار انکسار میں دل

نتیجہ حسرت و حرماں ہے شوق بے حد کا

خراب ہوگا بہت آرزوئے یار میں دل

بگڑ رہے ہیں عبث آپ اپنے کوکبؔ پر

وہ کیا کرے جو نہ ہو اس کے اختیار میں دل