kisi tarah se na bahla firaq-e-yar mein dil

kisī tarah se na bahlā firāq-e-yār meñ dil

ḳhizāñ kī tarah fasurda rahā bahār meñ dil

nahīñ hai chain muqaddar meñ be-qarāroñ ke

hamāre saath taḌaptā rahā mazār meñ dil

tafakkurāt-e-jahāñ se hai yak-qalam āzād

phañsā huā tire gesū-e-tābdār meñ dil

agar tū aa nahīñ saktā to kaash ajal aa.e

hai be-qarār bahut tere intizār meñ dil

kamāl-e-husn-e-tasavvur ye hai ki rahtā hai

shagufta gul kī tarah yād-e-rū-e-yār meñ dil

kahāñ hai ishq jo aa kar ise chhuḌā jaa.e

ghirā huā hai balā-hā-e-rozgār meñ dil

bas apnī apnī jagah lā-javāb haiñ donoñ

ġhurūr meñ nigah-e-yār inkisār meñ dil

natīja hasrat-o-hirmāñ hai shauq-e-behad kā

ḳharāb hogā bahut ārzū-e-yār meñ dil

bigaḌ rahe haiñ abas aap apne 'kaukab' par

vo kyā kare jo na ho us ke iḳhtiyār meñ dil

kisi tarah se na bahla firaq-e-yar mein dil

KHizan ki tarah fasurda raha bahaar mein dil

nahin hai chain muqaddar mein be-qararon ke

hamare sath taDapta raha mazar mein dil

tafakkuraat-e-jahan se hai yak-qalam aazad

phansa hua tere gesu-e-tabdar mein dil

agar tu aa nahin sakta to kash ajal aae

hai be-qarar bahut tere intizar mein dil

kamal-e-husn-e-tasawwur ye hai ki rahta hai

shagufta gul ki tarah yaad-e-ru-e-yar mein dil

kahan hai ishq jo aa kar ise chhuDa jae

ghira hua hai bala-ha-e-rozgar mein dil

bas apni apni jagah la-jawab hain donon

ghurur mein nigah-e-yar inkisar mein dil

natija hasrat-o-hirman hai shauq-e-behad ka

KHarab hoga bahut aarzu-e-yar mein dil

bigaD rahe hain abas aap apne 'kaukab' par

wo kya kare jo na ho us ke iKHtiyar mein dil