کسی تیز جھونکے کے سنگ تھی مری اوڑھنی

کسی تیز جھونکے کے سنگ تھی مری اوڑھنی

کبھی سر پہ تھی کبھی اڑ گئی مری اوڑھنی

وہ جو زخم خوردہ سی وحشتیں تھی نگاہ میں

انہیں اپنے پلو سے جوڑتی مری اوڑھنی

کوئی سائباں جو دعا سا تھا مری راہ میں

وہ نہیں رہا تو کہاں رہی مری اوڑھنی

وہ سنبھل سنبھل کے اٹھا رہی ہے ہر اک قدم

مری لاڈلی نے جو اوڑھ لی مری اوڑھنی

جو مرے نصیب کے خواب تھے وہ سراب تھے

انہی موسموں میں رچی بسی مری اوڑھنی

نہ کسک رہی نہ چسک رہی نہ ہی حیرتیں

وہ بدل گیا تو بدل گئی مری اوڑھنی