kisi tez jhonke ke sang thi meri oDhni

kisī tez jhoñke ke sañg thī mirī oḌhnī

kabhī sar pe thī kabhī uḌ ga.ī mirī oḌhnī

vo jo zaḳhm-ḳhurda sī vahshateñ thī nigāh meñ

unheñ apne pallū se joḌtī mirī oḌhnī

koī sā.ebāñ jo duā sā thā mirī raah meñ

vo nahīñ rahā to kahāñ rahī mirī oḌhnī

vo sambhal sambhal ke uThā rahī hai har ik qadam

mirī lāDlī ne jo oḌh lī mirī oḌhnī

jo mire nasīb ke ḳhvāb the vo sarāb the

unhī mausamoñ meñ rachī-basī mirī oḌhnī

na kasak rahī na chasak rahī na hī hairateñ

vo badal gayā to badal ga.ī mirī oḌhnī

kisi tez jhonke ke sang thi meri oDhni

kabhi sar pe thi kabhi uD gai meri oDhni

wo jo zaKHm-KHurda si wahshaten thi nigah mein

unhen apne pallu se joDti meri oDhni

koi saeban jo dua sa tha meri rah mein

wo nahin raha to kahan rahi meri oDhni

wo sambhal sambhal ke uTha rahi hai har ek qadam

meri laDli ne jo oDh li meri oDhni

jo mere nasib ke KHwab the wo sarab the

unhi mausamon mein rachi-basi meri oDhni

na kasak rahi na chasak rahi na hi hairaten

wo badal gaya to badal gai meri oDhni