kitab-e-ishq ka ek bab likh diya maine

kitāb-e-ishq kā ik baab likh diyā maiñ ne

zamīñ sarāb falak ḳhvāb likh diyā maiñ ne

hamārī nazroñ se jām-e-sifāl jab guzrā

pas-e-duā use nāyāb likh diyā maiñ ne

sukūt-e-āb ko us ne sukūt-e-āb likhā

sukūt-e-āb ko girdāb likh diyā maiñ ne

vo koī jabr thā yā jabr se farār mirā

ruḳh-e-muhīb ko mahtāb likh diyā maiñ ne

ki raushnī kī na thī taab chashm-e-tābāñ ko

siyāhiyoñ ko tab-o-tāb likh diyā maiñ ne

vo be-ḳhudī kā thā aalam ki vajd kī sūrat

jo āb-e-sāda mai-e-nāb likh diyā maiñ ne

tapīda shām-o-sahar the tapīda jism-o-jigar

tapīda jaan pe jab aab likh diyā maiñ ne

tumhārī sho.ala-bayānī kā zikr thā har-sū

tumhāre sho.ale pe ġharqāb likh diyā maiñ ne

salām band kiyā us ne phir kalām bhī band

so us ko āḳhirī ādāb likh diyā maiñ ne

kitab-e-ishq ka ek bab likh diya main ne

zamin sarab falak KHwab likh diya main ne

hamari nazron se jam-e-sifal jab guzra

pas-e-dua use nayab likh diya main ne

sukut-e-ab ko us ne sukut-e-ab likha

sukut-e-ab ko girdab likh diya main ne

wo koi jabr tha ya jabr se farar mera

ruKH-e-muhib ko mahtab likh diya main ne

ki raushni ki na thi tab chashm-e-taban ko

siyahiyon ko tab-o-tab likh diya main ne

wo be-KHudi ka tha aalam ki wajd ki surat

jo aab-e-sada mai-e-nab likh diya main ne

tapida sham-o-sahar the tapida jism-o-jigar

tapida jaan pe jab aab likh diya main ne

tumhaari shoala-bayani ka zikr tha har-su

tumhaare shoale pe gharqab likh diya main ne

salam band kiya us ne phir kalam bhi band

so us ko aaKHiri aadab likh diya main ne