kitab-e-waqt mein sachchi ibarat main likhunga

kitāb-e-vaqt meñ sachchī ibārat maiñ likhūñgā

munāfiq jo nahīñ likhte haiñ 'shaukat' maiñ likhūñgā

charāġh-o-ā.ina se kaam lūñgā satr-dar-satr

na.e andāz se injīl-e-hairat maiñ likhūñgā

musāfir shaam kā huuñ ai mirī sub.h-e-madīna

lahū aur ashk se apnī hikāyat maiñ likhūñgā

ḳhudā ne ye sa.ādat merī qismat meñ likhī hai

ġhazal sehrā sar-e-kū-e-malāmat maiñ likhūñgā

ḳhudāvandā ba-nām-e-ādmiyyat ik khulā ḳhat

khulā ḳhat ik ba-nām-e-ādmiyyat maiñ likhūñgā

junūbī asia ke sabz mustaqbil kī ḳhātir

na.ī nasloñ kā ailān-e-mohabbat maiñ likhūñgā

amīr-e-shahr maiñ shā.ir huuñ darbārī nahīñ huuñ

tujhe kis ne kahā terī fazīlat maiñ likhūñgā

ġhazal ke ahd-nāma meñ na.ī satr-e-bashārat

mohabbat kī na.ī satr-e-bashārat maiñ likhūñgā

mirā maslak sanā-e-ādmī karnā hai 'shaukat'

sanā-e-ādmī merī ibādat maiñ likhūñgā

kitab-e-waqt mein sachchi ibarat main likhunga

munafiq jo nahin likhte hain 'shaukat' main likhunga

charagh-o-aina se kaam lunga satr-dar-satr

nae andaz se injil-e-hairat main likhunga

musafir sham ka hun ai meri subh-e-madina

lahu aur ashk se apni hikayat main likhunga

KHuda ne ye saadat meri qismat mein likhi hai

ghazal sehra sar-e-ku-e-malamat main likhunga

KHudawanda ba-nam-e-admiyyat ek khula KHat

khula KHat ek ba-nam-e-admiyyat main likhunga

junubi asia ke sabz mustaqbil ki KHatir

nai naslon ka ailan-e-mohabbat main likhunga

amir-e-shahr main shair hun darbari nahin hun

tujhe kis ne kaha teri fazilat main likhunga

ghazal ke ahd-nama mein nai satr-e-bashaarat

mohabbat ki nai satr-e-bashaarat main likhunga

mera maslak sana-e-admi karna hai 'shaukat'

sana-e-admi meri ibaadat main likhunga