kitab-e-zist mein aisa koi bhi bab nahin

kitāb-e-zīst meñ aisā koī bhī baab nahīñ

tumhāre 'ishq kā jis par likhā hisāb nahīñ

sharāb-ḳhāne meñ do buuñd bhī sharāb nahīñ

hamāre vāste is se baḌā 'azāb nahīñ

huī ye zindagī tārīk raat ke mānind

tū māhtāb nahīñ maiñ bhī āftāb nahīñ

na.ī hayāt meñ Dhalnā paḌegā ab is ko

ye zindagī to mohabbat meñ kāmyāb nahīñ

tū apnī āñkhoñ kā chashma badal ke dekh mujhe

jahān jitnā hai itnā to maiñ ḳharāb nahīñ

hameñ bhī tark-e-ta'alluq kā ḳhaak ho afsos

bichhaḌ ke ham se tumheñ bhī to iztirāb nahīñ

ye mai-kada hai yahāñ hai har ek shaḳhs qubūl

koī sharīf nahīñ hai koī ḳharāb nahīñ

ḳhizāñ ne kaun sī tartīb se kiyā barbād

kisī bhī shāḳh pe gulshan meñ ik gulāb nahīñ

kitab-e-zist mein aisa koi bhi bab nahin

tumhaare 'ishq ka jis par likha hisab nahin

sharab-KHane mein do bund bhi sharab nahin

hamare waste is se baDa 'azab nahin

hui ye zindagi tarik raat ke manind

tu mahtab nahin main bhi aaftab nahin

nai hayat mein Dhalna paDega ab is ko

ye zindagi to mohabbat mein kaamyab nahin

tu apni aankhon ka chashma badal ke dekh mujhe

jahan jitna hai itna to main KHarab nahin

hamein bhi tark-e-ta'alluq ka KHak ho afsos

bichhaD ke hum se tumhein bhi to iztirab nahin

ye mai-kada hai yahan hai har ek shaKHs qubul

koi sharif nahin hai koi KHarab nahin

KHizan ne kaun si tartib se kiya barbaad

kisi bhi shaKH pe gulshan mein ek gulab nahin