کتاب جلتی رہی صاحب کتاب گیا

کتاب جلتی رہی صاحب کتاب گیا

عجب سلگتی سی تعبیر دے کے خواب گیا

عجیب جھوٹ کی خوشبو تھی مست رہتے تھے

گماں کی شاخ پہ باقی جو تھا گلاب گیا

سیاہیوں کا سمندر ہے اب تو چاروں طرف

وہ روشنی کا سفر منتظر سراب گیا

حیات جب بھی کسی امتحاں سے گزری ہے

سوال کرنے جو آیا تھا لاجواب گیا

تھا زخم دل کا مگر خونچکاں ہوئیں آنکھیں

وہ شخص مر نہ سکا خون بے حساب گیا

بدن کی پیاس تو جسموں کا قرب مانگے ہے

تمیز حسن گئی ذوق انتخاب گیا

چراغ دن میں جلاتے ہو کس لیے سرشارؔ

نظر کا نور گیا ہے کہ آفتاب گیا