kitaben meri sari jal rahi thin KHwab kaisa tha

kitābeñ merī saarī jal rahī thiiñ ḳhvāb kaisā thā

savā neze pe sūraj thā to phir mahtāb kaisā thā

savād-e-shab ridā-e-tīrgī kī vus.ateñ oḌhe

bhaTaktā phir rahā thā kirmak-e-shab-tāb kaisā thā

shanāvar maiñ bhī thā bhūke nahangoñ ke samundar meñ

mire atrāf lekin ḳhuun kā girdāb kaisā thā

maiñ apnī zindagī ko lamha lamha khoj bhī letā

magar vo qatra qatra pyaas kā zahrāb kaisā thā

vo nas nas meñ samā kar bhī gurezāñ mujh se kyūñkar thā

vo merā ho gayā thā aur phir nāyāb kaisā thā

'matīn-iqbāl’ itnī baat tum ne bhī nahīñ samjhī

mohabbat kā vo dariyā is qadar pāyāb kaisā thā

kitaben meri sari jal rahi thin KHwab kaisa tha

sawa neze pe suraj tha to phir mahtab kaisa tha

sawad-e-shab rida-e-tirgi ki wusaten oDhe

bhaTakta phir raha tha kirmak-e-shab-tab kaisa tha

shanawar main bhi tha bhuke nahangon ke samundar mein

mere atraf lekin KHun ka girdab kaisa tha

main apni zindagi ko lamha lamha khoj bhi leta

magar wo qatra qatra pyas ka zahrab kaisa tha

wo nas nas mein sama kar bhi gurezan mujh se kyunkar tha

wo mera ho gaya tha aur phir nayab kaisa tha

'matin-iqbaal’ itni baat tum ne bhi nahin samjhi

mohabbat ka wo dariya is qadar payab kaisa tha