kitna aage nikal gaya hun main

kitnā aage nikal gayā huuñ maiñ

ġham ke sāñche meñ Dhal gayā huuñ maiñ

jal rahā thā makān us kā magar

maiñ ye samjhā ki jal gayā huuñ maiñ

aap apne pe paḌ ga.ī jo nazar

ḳhud hī hañs kar bahal gayā huuñ maiñ

vo ki mahloñ meñ be-qarār rahā

dasht-o-sahrā meñ pal gayā huuñ maiñ

chalte chalte vafā kī rāhoñ meñ

girte girte sañbhal gayā huuñ maiñ

garmī-e-zīst jab baḌhī 'saifī'

barf jaisā pighal gayā huuñ maiñ

ḳhāk-pā-e-rasūl ai 'saifī'

apnī āñkhoñ se mal gayā huuñ maiñ

kitna aage nikal gaya hun main

gham ke sanche mein Dhal gaya hun main

jal raha tha makan us ka magar

main ye samjha ki jal gaya hun main

aap apne pe paD gai jo nazar

KHud hi hans kar bahal gaya hun main

wo ki mahlon mein be-qarar raha

dasht-o-sahra mein pal gaya hun main

chalte chalte wafa ki rahon mein

girte girte sanbhal gaya hun main

garmi-e-zist jab baDhi 'saifi'

barf jaisa pighal gaya hun main

KHak-pa-e-rasul ai 'saifi'

apni aankhon se mal gaya hun main