kitna ba-zarf hai wo mere barabar wala

kitnā bā-zarf hai vo mere barābar vaalā

ḳhushk āñkhoñ ko diyā ġham to samundar vaalā

bāġhbānī meñ kaTī umr to saarī lekin

phuul ab tak na khilā apne muqaddar vaalā

ḳhvāb kī vahshateñ qaa.em rahīñ shab bhar mujh par

dar pe detā hī rahā dastakeñ bāhar vaalā

hijr aaseb hai aaseb bhī aisā sāhab

hausla haar gayā maiñ bhī sikandar vaalā

ham manāeñge nayā saal tirī yaad ke saath

zaḳhm is baar harā hogā december vaalā

qahqahoñ se to zamāna huā mahrūm haiñ lab

aur fasāne meñ mirā rol hai joker vaalā

toḌe jā.eñge sitam tere tujhī par 'āfāq'

ik tamāsha to abhī aur hai mahshar vaalā

kitna ba-zarf hai wo mere barabar wala

KHushk aankhon ko diya gham to samundar wala

baghbani mein kaTi umr to sari lekin

phul ab tak na khila apne muqaddar wala

KHwab ki wahshaten qaem rahin shab bhar mujh par

dar pe deta hi raha dastaken bahar wala

hijr aaseb hai aaseb bhi aisa sahab

hausla haar gaya main bhi sikandar wala

hum manaenge naya sal teri yaad ke sath

zaKHm is bar hara hoga december wala

qahqahon se to zamana hua mahrum hain lab

aur fasane mein mera rol hai joker wala

toDe jaenge sitam tere tujhi par 'afaq'

ek tamasha to abhi aur hai mahshar wala