kitna bechain hai KHamosh samundar dekho

kitnā bechain hai ḳhāmosh samundar dekho

dil kī gahrā.ī meñ ik roz utar kar dekho

qatl ho jā.egā sūraj to lahū hogī sahar

dekhnā hai to abhī sub.h kā manzar dekho

rāz-dar-rāz hai alfāz kī gahrā.ī meñ

mere chehre pe jo tahrīr hai paḌh kar dekho

ḳhāmushī guuñj bhī hai chīḳh bhī hai naġhma bhī

tum kisī peḌ ko nazdīk se chhū kar dekho

kaise patthar kā jigar chiir ke uThtī hai hayāt

kisī chaTTān tale biij dabā kar dekho

yuuñ to chehre pe sajā rakkhī hai ik bazm-e-tarab

kitne maqtal haiñ mire siine ke andar dekho

kitnī dilkash hai dil-afroz hai duniyā-e-danī

apnī āñkhoñ se zarā haath haTā kar dekho

is ‘aqīde ne liyā qaisar-o-kisrā se ḳhirāj

maut kā vaqt azal se hai muqarrar dekho

tā-ba-kai shaukat-e-ajdād pe ye nāz-o-ġhurūr

ḳhvāb-e-ġhaflat se uTho vaqt ke tevar dekho

āsmāñ chiir ke jā.egā sitāroñ se pare

tum bhī ik baar chalā kar zarā patthar dekho

maar Dālegī galā ghoñT ke sadiyoñ kī ghuTan

khiḌkiyāñ khol do kuchh der to bāhar dekho

dekh lenā pas-e-qātil bhī koī hogā zarūr

sirf qātil hī chalātā nahīñ ḳhanjar dekho

saḳht se saḳht huā jaatā hai chehra us kā

zindagī kā ye badaltā huā paikar dekho

kitna bechain hai KHamosh samundar dekho

dil ki gahrai mein ek roz utar kar dekho

qatl ho jaega suraj to lahu hogi sahar

dekhna hai to abhi subh ka manzar dekho

raaz-dar-raaz hai alfaz ki gahrai mein

mere chehre pe jo tahrir hai paDh kar dekho

KHamushi gunj bhi hai chiKH bhi hai naghma bhi

tum kisi peD ko nazdik se chhu kar dekho

kaise patthar ka jigar chir ke uThti hai hayat

kisi chaTTan tale bij daba kar dekho

yun to chehre pe saja rakkhi hai ek bazm-e-tarab

kitne maqtal hain mere sine ke andar dekho

kitni dilkash hai dil-afroz hai duniya-e-dani

apni aankhon se zara hath haTa kar dekho

is ‘aqide ne liya qaisar-o-kisra se KHiraj

maut ka waqt azal se hai muqarrar dekho

ta-ba-kai shaukat-e-ajdad pe ye naz-o-ghurur

KHwab-e-ghaflat se uTho waqt ke tewar dekho

aasman chir ke jaega sitaron se pare

tum bhi ek bar chala kar zara patthar dekho

mar Dalegi gala ghonT ke sadiyon ki ghuTan

khiDkiyan khol do kuchh der to bahar dekho

dekh lena pas-e-qatil bhi koi hoga zarur

sirf qatil hi chalata nahin KHanjar dekho

saKHt se saKHt hua jata hai chehra us ka

zindagi ka ye badalta hua paikar dekho