kitne bhule hue naghmat sunane aae

kitne bhūle hue naġhmāt sunāne aa.e

phir tire ḳhvāb mujhe mujh se churāne aa.e

phir dhanak-rañg tamannāoñ ne gherā mujh ko

phir tire ḳhat mujhe dīvāna banāne aa.e

phir tirī yaad meñ āñkheñ huiiñ shabnam shabnam

phir vahī niiñd na aane ke zamāne aa.e

phir tirā zikr kiyā bād-e-sabā ne mujh se

phir mire dil ko dhaḌakne ke bahāne aa.e

phir mire kāsa-e-ḳhālī kā muqaddar jaagā

phir mire haath mohabbat ke ḳhazāne aa.e

shart sailāb samone kī lagā rakkhī thī

aur do ashk bhī ham se na chhupāne aa.e

kitne bhule hue naghmat sunane aae

phir tere KHwab mujhe mujh se churane aae

phir dhanak-rang tamannaon ne ghera mujh ko

phir tere KHat mujhe diwana banane aae

phir teri yaad mein aankhen huin shabnam shabnam

phir wahi nind na aane ke zamane aae

phir tera zikr kiya baad-e-saba ne mujh se

phir mere dil ko dhaDakne ke bahane aae

phir mere kasa-e-KHali ka muqaddar jaga

phir mere hath mohabbat ke KHazane aae

shart sailab samone ki laga rakkhi thi

aur do ashk bhi hum se na chhupane aae