کتنے کانٹوں سے بھری ہے یہ ڈگر جانتے ہیں

کتنے کانٹوں سے بھری ہے یہ ڈگر جانتے ہیں

کیسا مشکل ہے محبت کا سفر جانتے ہیں

اب نہیں دورئ منزل کا کوئی خوف ہمیں

آبلہ پائی کو سہنے کا ہنر جانتے ہیں

ہم نے کب تم کو بنایا ہے محافظ اپنا

کیسے کرنا ہے ہمیں اپنا سفر جانتے ہیں

ہم نے دیکھے ہیں بدلتے ہوئے دنیا کے چلن

کیسے انداز کی ہے کس کی نظر جانتے ہیں

یہ جو طوفاں ہمیں لے آتے ہیں ساحل کی طرف

یہ ہے سب ماں کی دعاؤں کا اثر جانتے ہیں

ہم بھی تسنیمؔ رہے شام و سحر گردش میں

اپنی روداد کو یہ شمس و قمر جانتے ہیں