kitne saqi ma-e-gulfam liye phirte hain

kitne saaqī ma-e-gulfām liye phirte haiñ

aur ham haiñ ki tahī-jām liye phirte haiñ

umr guzrī ke tabassum kī tarah hoñToñ par

talḳhī-e-gardish-e-ayyām liye phirte haiñ

tazkire haiñ ye chaman meñ ki sabhī lāla-o-gul

nik.hat-e-āriz-e-gulfām liye phirte haiñ

sharm ai husn-e-jafā-pesha ki kūche meñ tire

aaj tak ham dil-e-nākām liye phirte haiñ

jaane kyā dekhā hai un shoḳh nigāhoñ meñ ki ham

apne sar muft kā ilzām liye phirte haiñ

jab se ham ne tire kūche se guzarnā chhoḌā

nāma-bar shahr meñ paiġhām liye phirte haiñ

kyā kareñge vo mirī rātoñ ko raushan 'arshad'

ruḳh pe jo zulf-e-siyah-fām liye phirte haiñ

kitne saqi ma-e-gulfam liye phirte hain

aur hum hain ki tahi-jam liye phirte hain

umr guzri ke tabassum ki tarah honTon par

talKHi-e-gardish-e-ayyam liye phirte hain

tazkire hain ye chaman mein ki sabhi lala-o-gul

nikhat-e-ariz-e-gulfam liye phirte hain

sharm ai husn-e-jafa-pesha ki kuche mein tere

aaj tak hum dil-e-nakaam liye phirte hain

jaane kya dekha hai un shoKH nigahon mein ki hum

apne sar muft ka ilzam liye phirte hain

jab se hum ne tere kuche se guzarna chhoDa

nama-bar shahr mein paigham liye phirte hain

kya karenge wo meri raaton ko raushan 'arshad'

ruKH pe jo zulf-e-siyah-fam liye phirte hain